Spreadian Clinic - 寵物攝影小撇步

[寵物攝影小撇步]

‍

正所謂個個都影相…唔通個個都識影相咩…？

想幫寵物留倩影，唔通真係下下要俾錢去影樓讓專業的來？

非也非也！只要識得運用以下呢啲小撇步，你都一樣可以影到出得街嘅寵物照㗎。

1. 利用自然光源

一個平凡嘅女仔影相嘅時候有女神光加持，佢就會變成女神！

而你屋企嘅主子都唔例外。

只要有自然光加持，就算你係手殘星人，0技術都好都可以屎忽撞棍影到幾張靚相㗎。

2. 用寵物嘅高度去影

我地成日習慣咗係高處影落寵物到，以45度或者90度、用人類嘅視角望落去。

有冇諗過點樣可以加強幅相嘅交流感？

只要趴低身平視主子對眼，就可以更容易咁捕捉到佢地楚楚可憐嘅眼神，令睇到幅相嘅奴才好似真係同主子對視緊咁樣㗎！

3. 高快門捕捉動感

唔少寵物都坐唔定冇時停、又動作多多。好多時想影低佢地跳高、又或者跑得好快嘅英姿嘅時候，往往會好似地震咁，完全唔知影緊啲乜…

其實要捕捉動感，只要較高快門至1/500s以上，咁就可以好容易咁樣影低佢哋每一個微小嘅動作㗎啦！

‍